In die vorige aflewering het ons gekyk na die belangrikheid van ‘n eie studieplek vir elke kind in die huis. ‘n Ewe belangrike tweede stap is om ons kinders te help om hul eie papierwerk sistematies te organiseer.
Elke skool het ‘n eie sisteem vir werkboeke, inligting op tablette soos iPads, en uitdeelstukke. Die vraag is wat die beste manier is om opsommings en aantekeninge wat leerders maak vir self-studie, te hanteer sodat dit nie eindig as ‘n swetterjoel los papiere wat geen verband hou met hul verpligte skoolwerk nie?
Die eerste stap is om te volgende aan te skaf:
• EEN “ring binder” lêer van 2 cm dik
• ‘n Stel plastiekafskortings met verskillende kleure vir die lêer
• ‘n Paar A4 plastieksakkies wat voorin die lêer ‘n plek kry
• EEN nota (skryf)boek waarvan die blaaie netjies afgeskeur kan word, met gate reeds ingepons aan die linkerkant
Merk nou elkeen van die plastiekafskortings vir ‘n ander vak, en sit by voorbaat ‘n paar skoon bladsye uit die skryfboek in elke afskorting van die lêer.
Merk die eerste afskorting “Vandag se werk” en sit ‘n A4 plastieksakkie in hierdie vakkie. Hierin word al die los papiere, klasnotas, of opsommings wat in skooltyd in die verskillende vakke gemaak word (en dus nog nie ponsgate vir liassering het nie), saamgevoeg. By die huis, is die eerste ding wat gedoen word om ponsgate te maak in al die los papiere in die “Vandag se werk”-vakkie, en uit te sorteer in die verskillende vakke se afskortings.
In die klaskamer en by die huis, word enige voorbereiding vir eie gebruik soos notas en opsommings, dadelik op die skryfpapier van die betrokke vak se afskorting gedoen.
Organisasie en sinvolle liassering en is nie alles nie, maar dit is baie belangrik in enige persoon se lewe. Goeie organisasie help nie ons kinders om meer te leer nie, maar dit verminder beslis vermorsing van tyd en frustrasie met die leerproses.